General Santos City—padayon pa ang gihimong imbistigasyon sa Police Station 4 kalabutan sa kamatayon sa biktimang si Edgardo Sagcal Espital, 52, residenti sa Salangsang Subd., Barangay san Isidro, Gensan kansa una nang gibunalan ug gahing butang ang ulo niini hinungdan sa iyang kamatayon.
Nasayran nga una nang nakaplagan ang patayng lawas sa biktima alas 6:30 ang takna sa buntag kagahapong adlawa sa may Asturias Compound, Caseres Subd., Barangay san Isidro, Gensan sa usa ka Ailyn Asturias, 38 anyos nga residenti sa may Soledad State, Barangay City Heights, Gensan.
Sumala ni Ailyn nga siya nahidangat sa lugar aron unta nga bisitahon ang iyang bana nga nagpuyo sa lugar apan siya nakalitan dihang nakit-an ang nagbuy-od nga biktima nga wala nay kinabuhi.
Sumala sa mga kaila sa nasangpit nga biktima nga usa ka adlaw ayha nakaplagan ang patayng lawas sa biktima, sila nag inum pa sa maong lugar apan miuli kini sa ilang panimalay. Natingala nalang sila dihang kagahapong adlawa patay na kining nakaplagan.
Sa karon padayon ang gihimong imbistigasyon sa kapulisan kalabutan sa insidenti.
