Motibo sa lolo nga nagdalag armas ginasuta

148

Davao City – Dili pa masuta sa kapulisan og unsa gayuy motibo sa pagdala og armas sa usa ka senior citizen nga nadakpan dinhi sa syudad sa Davao.

Kini ang gibutyag ni Police Regional Office kun PRO XI Spokesperson PCI Jason Baria atol sa gipahigayong AFP-PNP Press conference diin kahinumduman nga nadakpan ang usa ka Bambaran Bantog, 90 anyos, nga taga Tamparan, Lanao del Sur human nakuhaan og mga armas ug hinagiban samtang pasulod unta sa Office of the Special Assistant to the President kun OSAP.

Sumala ni Baria nga nakigkoordinar siya sa Davao City Police Office o DCPO bahin niini apan naglisod og suta ang otoridad sa motibo sa tiguwang.

Apan gibutyag ni Baria nga sa inisyal nila nga imbestigasyon, buot lang mangayo og pinansyal nga tabang ang nadakpan ngadto sa OSAP.

Una usab gikareport nga buot matud pa patyon sa arestado si Pangulong Rodrigo Duterte.

Hinuon padayon pa kining ginaimbestigahan sa nga otoridad.

Sa karon, napasakahan na og kaso ang maong dinakpan kinsa nag atubang og mga kasong adunay kalapasan sa RA 10591 kun Illegal Possession of Firearms and Ammunition, Illegal Possession of Deadly Weapon ug kalapasan sa Omnibus Election code kun Comelec Gun Ban.

RadyoMaN Renz Barbarona

Facebook Comments