General Santos City- Blangko pa karon ang Police Station 6 sa motibo ug responsible sa nahitabong pag pamusil sa ilahang area of responsibility diin biktima ang usa ka tricycle driver nga si Sammy Ticam, 45 anyos nga nanimuyo sa Purok Sarif Mocsin, Barangay Baluan, Gensan niadtong Domingo sa Gabie.
Sumala pa ni Police Captain Nemencio Calipjo Jr., hepe sa Police Station 6 nga sa karon padayon pa ang ilahang ginahimong makuting imbestigasyon aron masayran kung aduna bay bahad o nakalaban ang nasangpit nga biktima ayha nahitabo ang pagpamusil.
Bisan na ang asawa sa bitkima nga si Julie Ticam wala nasayud sa posibleng motibo sa pagpusil sa iyahang bana.
Saysay sa ginang nga alas 8:00 pasado ang takna sa gabii dihang pugsanong misulod ang suspek sa ilang panimalay ug dayon gipusil kaduha ka higayon ang iyahang bana.
Nsayran nga wala namay-ungan sa ginang ang nawong sa suspek gumikan nakatalikod na kini dihang iyahang gigukod.
Sa karon gitugyan nalang sa ginang ang imbestigasyon sa kaso sa iyang bana ngadto sa kapulisan ug siya nanghinaot nga mailhan ang suspek aron ilang makasuhan.(RV)
