Sa interbyu sa DXDC RMN Davao kang Police Lieutenant Colonel Kristopher Sabsal, Chief of Police sa Sta. Cruz Municipal Police Station (MPS), giila niini ang biktima nga si Emanuel Nestor Pilongo, 35 anyos, minyo, trabahante ug residente sa Purok Kapayapaan sa nahisgutang barangay.
Matud sa nakasaksi sa insidente, alas 7:52 sa gabii sa maong adlawa sa dihang nakadungog kini og tulo ka buto sa armas ug nakita niini ang usa ka lalaki nga naka-motor nga gilayong misibat paingon sa north bound area human sa panghitabo.
Sa pagsusi sa awtoridad, nakit-an na lamang ang biktima nga wala nay kinabuhi ug adunay duha ka samad pinusilan.
Sa pakighinabi sa kapulisan sa pamilya sa biktima, wala matud pa silay nahibaloan nga nakadawat og hulga ang biktima ayha nahitabo ang shooting incident.
“Sa pagkakaron, wala pa ‘tay konkreto nga person of interest. Basta naa lang ‘tay ginatutokan nga (anggulo). Posible (nga) sa iyahang trabaho o personal niya nga kinabuhi,” sulti ni Sabsal.
Ginasubay usab karon sa Sta. Cruz MPS ang closed-circuit television (CCTV) sa lugar nga makatabang sa imbestigasyon ilabi na ang pag-ila sa responsable sa krimen.
RadyoMaN Kirby Manzon
