Sa pakighinabi sa DXDC RMN Davao kang Police Captain Archel Calamba, investigation officer sa Tagum City PS, iyang giila ang biktima nga si Brain Jupiter, 34 anyos, residente sa Sison Subdivision, Magugpo South, Tagum City.
Saysay ni Calamba nga adunay giproseso ang biktima sa HR sa LYR ug pahuman sa iyang transaksyon ug paggawas niini, kalit na lamang kining gipusil sa makadaghang higayon sa usa ka lalaking nagbaktas nga naka-helmet ug naka-jacket nga itom, diin kini posibleng adunay kauban nga nga naka-motor sa unahan.
Dead on the spot ang biktima human kini naigo sa iyang ulo, diin narekober sa crime scene ang unom ka mga basiyo sa bala nga gituohang gikan sa .45 nga pistola. Ginasubay pa usab karon ang available closed-circuit television (CCTV) cameras sa area aron ma-identify ang supek.
“Amo pang gisubay (CCTV). Bale sa among pagpanubay, adunay tulo ka establishments nga posibleng nga didto niagi (ang suspek). Basin mahagip sya didto,” saysay sa pulis.
Dugang sa police official nga walay nahibaloan ang pamilya nga adunay hulga ang biktima, apan adunay gisulti ang live-in partner sa biktima nga aduna matud pa kini gi-utangan og kwarta, apan dili pa ma-establisar kung kini ba ang motibo sa krimen.
RadyoMaN Kirby Manzon
