South Cotabato- laing kaso na usab sa pagpangawat ug motorsiklo ang natala sa syudad sa Koronadal niadtong nakalabayng gabie samtang kini giparking lang atubangan sa Internet Café sa Gensan Driver, Barangay Zone 4.
Una nang nagpatala sa buhatan sa Koronadal PNP ang nanag-iya sa Honda RS 125 kolor silver ug maroon nga may plate number 6196 MQ nga si Ricardo Abrico, human kining nawagtang pila ka oras human nga giparking sa anak niining si Jeth Vicente Abrico, 17, estudyante ug residente sa Purok Bulak, Barangay Paraiso, Koronadal atubangan sa Net Central.
Gisuwayan pa nilag pangita ang maong motorsiklo apan wala na gyud kini hikaplagi mao nga ila nalang gipatala sa buhatan sa kapulisan.
Gilayon man nga gi-flash alarm sa Koronadal PNP ngadto sa kwerpo sa kapulisan sa mga kasigbit nga munisipyo ug syudad ang maong motorsiklo sa pamasin nga masiplatan ang mga nagdagit niini.
Nasayran nga nagpadayag na ug kaalarma ang pipila ka mga nanag-iyag motorsiklo sa syudad sa Koronadal gumikan na usab sa sunod-sunod nga pagpangawat ug motorsiklo nga natigayon sa maong lugar.
