General Santos City—usa ang patay samtang usa sab ang angol human mibangga sa Poste sa kuryente nga nahimutang sa Crossing Intake, Brgy Mabuhay ning dakbayan ang ilang gisakyang motorsiklo.
Biktimang namatay giilang si Rakim Daye, 21-anyos, samtang giila sab ang kaubanan niini nga samdan nga si Remy Daye, 19-anyos, pulos residenti sa Koronadal City.
Sa inisyal nga imbistigasyon sa kapulisan nasuta nga padulong unta sa trabaho ang duruha apan pag-abot sa kurbada nga bahin, aksidenting nabangga ang ilang gisakyang motorsiklo sa poste kansa hinungdan sa paglagpot sa mga nasangpit.
Daling gipangdala sa ospital ang mga biktima apan nakabsan gyud ug kinabuhi si Daye human kining nakaangkon ug grabeng samad sa ulo nga bahin.
Samtang samad usab sa ulo ang naangkon sa angkas niini apan luwas na kini karon sa kuyaw nga kahimtang. Sa karon Padayon pa ang gihimong imbistigasyon sa kapulisan kalabutan sa maong insidente.
