Davao City – Nalagpot og pila ka metros ang driver sa motor human misungag sa taxi nga mupaliko na unta paingon sa Holy Cross High School sa Lanang ning siyudad alas 4:40 karon lang kadlawon.
Mituyok og pila ka higayon ang motor ayha nalagpot ang driver sa motor nga si Simon Padin nga usa ka call center agent resulta sa pagkabali sa usa niya ka tiil busa dali kini gitabang sa Medic Team sa Central 911.
Matud sa Makulay Taxi driver nga si Babe Batoy nga kusog matud pa ang dagan sa motor gikan sa south bound area mao nga pag-aksyon og liko sa kanto kalit midasmag ang motor.
Ug hugot kini gilimod ni Padin sanglit hinay lang daw iyang dagan apan ang problema mao nga wala nag-signal light ang taxi dihang miliko kinsa gikan sa norte nga bahin.
Sa dugang pagpanubay, gisulti sa kauban ni Padin nga 60 kph ang ilang dagan sa motor butang nga nakalapas sa speed limit sanglit 30 kph lang ang gitugot nga dagan sa Lanang area.
Gumikan sa kakusog sa impact, pirting gubaa sa duha ka pultahan sa taxi ug mibuto usab ang usa ka ligid niini ug samtang guba ang kilid sa motor.
Mihimo na karon og imbestigasyon ang Traffic Section sa Sta. Ana PNP aron masuta kung kinsa sa duha ang sad-an ug pasakaan og kaso subay sa kalapasan sa balaod trapiko.
RadyoMaN Joel Viray
