Nananawagan si House Committee on Transportation Senior Vice Chairman at 1-Rider Party-list Representative Rodge Gutierrez sa Land Transportation Franchising and Regulatory Board (LTFRB) at Department of Transportation (DOTr) na isama sa fare adjustment measures ang motorcycle taxi at delivery riders.
Sa kanyang privilege speech sa plenaryo ng Kamara ay iginiit ni Gutierrez na hindi makatwiran na hindi isinama ang motorcycle taxi at delivery riders sa provisional fare increases na ipinagkaloob sa iba’t ibang public utility vehicles (PUVs).
Diin ni Gutierrez, ang mga motorcycle taxi at delivery riders ay labis ding apektado ng pagtaas ng presyo ng langis at mga bilihin gayundin ang lumalaking gastusin sa spare parts at maintenance.
Giit ni Gutierrez, hindi dapat isantabi ang motorcycle taxi at delivery riders sa anumang hakbang o mekanismo na magpapagaan sa epekto sa pampublikong transportasyon ng krisis dulot ng gulo sa Gitnang Silangan.
