South Cotabato—Patay ang usa ka trabahante sa mall human kining gidaro sa usa ka prime mover sa national highway nga sakop sa Barangay Paraiso Koronadal City alas-8:00 kaganinang buntag, Pebrero 5, 2018.
Biktima nailang si Delfin Azuzena Jr., 19-anyos, lumulupyo sa Barangay Sinolon, TBoli, South Cotabato.
Subay sa imbistigasyon sa Traffic Management Unit sa Koronadal City PNP nasuta nga padulong na unta sa iyang gitrabahuan sa syudad sa Koronadal ang biktima sakay sa iyang motorsiklo dihang aksidenti kining nabangga sa prime mover diin milusot gyud kini sa ilawom nga bahin nga maoy hinungdan sa iyang kamatayon.
Nasayran nga naguyod pa sa dakong sakyanan ang motorsiklo sa biktima nga hinungdan nga nakaangkon kini ug grabeng mga samad sa kalawasan.
Nadala pa sa ospital ang biktima apan nakabsan gihapon kini sa iyang kinabuhi alas 12:00 sa udto. Sa karon ang driver sa prime mover anaa na sa kustudiya sa Koronadal Police Station.
