iFM Laoag – Natukkol iti saka ti maysa a motorista iti Barangay Balacad, Paoay, Ilocos Norte kalpasan a dinungparna ti sarsarunoenna a kotse.
Nabigbig ti motorista ken biktima a ni Mr. Aristotle Calumba y Padaca, agtawen ti tallupulo, maysa delivery boy, residente iti Barangay 30 iti ili ti Paoay idinto a ti nangiturong ti kotse ket ni Mr. Ferdinand Labiqui y Casil, agtawen ti limapulo ket dua, maysa a mannalon, ken residente iti Barangay Suba iti met laeng nasao nga ili.
Segun kenni Police Staff Sergeant Mark Dave Villegas, imbestigador ti insidente, agpapaabagatan a direksion ti kotse nga agawid kuman iti lugarda idin ta iti panagkurbana iti akin-kannigid a paset ti kalsada ket isu metten ti sipudna dinungpar ti motorista.
Innayun ti opisial nga iti imbestigasionda, nataray ti motorista a bimmayabay iti kalsada ken isut nangitunda ti panangdungparna iti kotse. Naammoan a naladaw a naripar iti motorist ti panagsinial iti kotse nga agkurba ken gapu iti kinapaspasna ket ditoy a naibalesna iti kannawan a sakana.
Insigida met nga intarayda ti motorista babaen iti Rural Health Unit iti Paoay sadiay Mariano Marcos Memorial Hospital and Medical Center iti siudad ti Batac para iti pannakatamingna. Manamnama nga agsaritan to dagiti dua iti PNP Paoay inton madischarge ti biktima iti ospital. (Joe Anne Agustin, RMN News)
