Dipolog City – Patay ang usa ka motorista human nabanggaan sa kasugat nga truck, mga ala 1:00 sa kadlawon sa may national highway Barangay Olingan, dakbayan sa Dipolog.
Gideklarang patay sa hospital ang biktimang si Carlo Timbas Legson, 21 anyos, ulitawo, lumulupyo sa Barangay Olingan kinsa nagmaneho sa motorsiklo honda beat ug way gisuot nga helmet.
Ang nakabanga nga drayber sa fuso canter truck, nga iya sa esr construction nagdala sa plaka numero AAQ-9739 naila nga si Ronald Moreno Elcamel, 33 anyos kin sa lumulupyo sa Barangay Diwan, Dipolog City.
Sa nahipos nga report gikan sa traffic sectiion sa Dipolog City Police Station, migawas sa inisyal nga imbestigasiyon, nga paingon sa habagatang bahin sa Barangay Punta ang truck, apan sa pag-abot sa dapit hitaboan, nabanggaan niini ang kasugat nga motorsiklo.
Gumikan sa kakusog sa impact, natumba og nabunal sa karsada ang biktima nakaangkon kini ug grabe nga mga samad sa nagkadaiyang parte sa lawas.
Gidala pa ang biktima sa Zamboanga del Norte Medical Center, aron unta katambalan apan wala’y swerting nakabsan gihapon kini sa hinulamang kinabuhi gumikan sa grabeng naangkon nga mga samad.
Nasuta sa medico legal nga nakainum og bino ang biktima, samtang ang driver sa truck posibleng magatubang og kasong reckless imprudence resulting to Homicide.
