Grabe el condiccion del un motorist desfues este hace bangga con el “road signage” del DPWH na highway del Barangay Bolong anoche.
Na report del Sangali Police Station ta aparece cay banda 8:40 del noche ayer, un Rouser 135 motorsiclo color colorao con placa numero 8487JS que ta maneja si Oswaldo Pantaleon y Jimenez,33, junto con su esposa si FO1 Joy Pantaleon y Agraviador,35, todo native de Imelda Poblacion, Zamboanga Sibugay Province, mientras ta navega na scuridad amediante del highway para aqui na sentro del fueblo, ya fuede sila hace bangga con el road signage na entrada Bolong rason para sila man baliskat y ya man ligid para na excavation area del camino que ta compone.
Asegun con el chuffer si Oswaldo, nuay asegun ele fuede gole cay curtao gale el camino y porcausa cay scuro, nuay le fuede nota con el road signage rason para man derecho ele na bongcao porsyon del camino.
Ya sustene mga irida na cuerpo y contusion el man maridable y canila ya lleva admitia para Zamboanga City Medical Center por el propio medicaccion. *– Bhong Simbajon/RMN News*
