Balete, Aklan – Daywa ron patay matapos nga magsunggaban ron sangka motorsiklo ag van kaina it mga alas 3:16 rong aga-aga sa national highway it Brgy. Feliciano, Balete, Aklan.
Ro mga biktima nakilae kanday Marold Dela Vega Quirino, 23-anyos ag si Jemar Quirino Elias, 23-anyos tanan residente it Brgy. Cortes, Balete, Aklan.
Samtang rong driver it Nissan Urvan Escapade hay nakilaea kay Norie Arboleda Gregorio 49-anyos ag residente it Brgy. Magpag-ong, Batan.
Sa imbestigasyon it Balete PNP nga natabo rong aksidente samtang rayang mga biktima halin sa direksyon it Banga paadto it Balete apang pag-abot sa lugar ko natabuan it aksidente partikular sa kurbada nga parte it karsada hay andang nahakasubeang rong van halin sa Balete paadto it Kalibo nga madasig rong daeagan ag umagaw it linya ko mga biktima ag nagbanggaan ro daywa ka mga saeakyan.
Bangud sa impact hay natumba rong motorsiklo sa konkretong karsada.
Insigida nga gindaea rong daywa sa hospital pero gin deklara nga dead on arrival si Elias bangud sa fatal nga lastro samtang si Quirino hay ginbawian man it hueam nga kabuhi samtang ginabueong sa hospital bangud man sa grabeng lastro.
Matapos rong aksidente hay insigida man nga nagsurender sa Balete MPS ag sa makaron hay detained sa lock up cell samtang ginahueat ro desisyon ko pamilya it mga biktima.
