General Santos City—Patay ang usa ka motorista human kining mibangga sa usa ka delivery Truck sa National Highway, sakop sa Purok 5, Barangay Katangawan, Gensan alas 5:00 pasado ang takna kaganinang kabuntagon.
Giila ang biktima nga si Ian Mark Daz, legal age, usa ka Merchandiser ug residenti sa Barangay Calumpang Gensan.
Subay sa inisyal nga imbistigasyon sa Traffic Management Unit nasuta nga gikan ug Gensan ang biktima padulong sa dereksyon sa Barangay Tinagacan, pag-abot sa Purok 5, Katangawan kalit matud pang niliko ang nasampit maong nibangga sa usa ka Delivery truck nga gimanihuan ni Jolito Raza nga taga Matina Davao City.
Nasayran nga gikan sa syudad sa Davao ang maong truck ug padulong unta sa Gensan aron nga maghatod ug mga tinapay apan pag abot sa lugar nabangga nuon ang motorsiklo sa maong truck.
Sumala sa driver sa truck nga si Jolito, layo pa iya nang nakit-an daan ang naghaguros nga motorsiklo sa biktima. Siya nagtuo nga deretso lang ang dagan niini apan kalit ra kining miliko maong mibangga sa gimanihuan niyang sakyanan.
Sa karon nagpadayon pa ang gihimong imbistigasyon kalabutan sa insidenti.
