Dead on arrival sa ospital ang driver sang motorsiklo nga ginkilala kay alyas Jan-jan, 14 anyos samtang pilason naman ang iya magulang nga iya back rider nga ginkilala kay alyas Carl, 15 anyos kag lunsay residente sang barangay Calayo, Cabatuan,Iloilo matapos makabunggo ang ila ginasakyan nga motor sa nasugata nila nga tricycle sa barangay Tabucan, Cabatuan pasado alas 11:00 kaina sang aga(Pebrero 2).
Base sa imbestigasyon sang Cabatuan PNP nga nag- overtake ang mag -utod sa ginasundan nga motor apang naglapaw sila sa linya kag wala gilayon makabalik kabangdanan nagbunggo ini sa tricycle nga gina maneho ni Francisco Oberio, 46 anyos ang edad kag residente sang barangay Tinio-an, Cabatuan, Iloilo.
Bangud sa impact kag bangud wala suksok nga helmet ang mag-utod, nakaangkon sang patal nga pilas sa ulo si alyas Jan-jan samtang kapilasan naman sa lawas ang naangkon sang iya magulang nga si alyas Carl.
Ginrefer naman sa ospital diri sa siudad sang Iloilo ang driver sang tricycle nga si Oberio bangud sa samad nga naangkon sini sa tuo nga kamot.
