General Santos City–padayon pa karon ang gihimong imbestigasyon sa kapulisan partikular na sa Police Station 1 kalabutan sa nahitabong motornapping sa ilahang area of responsibility kung asa usa ka motorsiklo ang gikawat nga gipanag-iyahan sa usa ka estudyante nga si Rudy Ante, 22 anyos, residente sa Barangay Landan, Polomolok, South Cotabato niadtong mialabayng adlaw.
Kahibaloan nga una nang nagpatabang ang estudyante sa kapulisan ug gisaysay niini nga pasado ala 1:00 sa kadlawon iyaha matud pang gipark ang iyang motorsiklo nga XRM-125 dunay kombinasyon nga kolor itom ug puti dunay temporaryong plaka numero, gawas sa iyang boarding house nga anaa nahimutang sa Prk. Acharon Extension Brgy. West ning syudad.
Apan nakurat na lamang kini sa iyang pagmata pasado alas 9:00 sa buntag sa susamang adlaw nga nawagtang na ang motorsiklo sa nahimutangan niini hinungdan nga nagpatabang kini sa kapulisan.
Sa kasamtangan naka flash alarm na kini sa pamasin nga marekober pa ang maong motorsiklo ug masikop ang suspek.(Reynald Timario)
