General Santos City—Walo ka mga personahe ang nadakpan sa gihimong buy-bust operation nga gipasiugdahan sa Police Station 5, Police Station 3, uban ang PDEA-12 sa managlahing lugar sa Gensan.
Unang nasikop sa usa ka balay kahilayan nga nahimutang sa Barangay Calumpang silang si Merasol Tesaluna, usa ka lakin-on ug usa ka Shella Mae Pendatun kansa nakuhaan ug pipila ka sachet sa gituohang shabu.
Sunod nga nadakpan sa Purok Crisostomo, Barangay Calumpang ang suspek nga si Rex Mahinay, 25 anyos ug residente sa maong lugar. Nakuhaan ang nasampit ug upat ka sachet sa gituohang shabu; Homemade nga armas ug upat ka mga buhing bala.
Dakpan usab ang suspek nga si Arielyn Sadaya, 23 anyos, nga taga Taluya, Glan, Sarangani Province. Nadakpan ang nasampit sa area sa Barangay Labangal, kung asa nakuhaan kini ug mukabat sa 20 ka gramo sa gituohang shabu nga may market value nga P136,000.00.
Sunod nga nadakpan mao si Welbert Salarde, kanhing kapuyo ni Arielyn nga taga Sasa, Davao ug kasamtangang nagpuyo sa usa ka apartment nga nahimutang sa Anas Subd., Barangay Lagao, Gensan. Nakuha sa iyang posisyon ang upat ka sachet sa gituohang shabu.
Samtang dakpan usab ang suspek nga si Jeffrey Jay Buison, 24, residenti sa Zone 1, Barangay Fatima, Gensan nakuhaan sab kini ug upat ka sachet sa gituohang shabu.
Dakpan usab silang si Phil Anthony Sas, residenti sa Gensan, Vill, Barangay Bula ug Lester Avelino human nakuhaan ug pinaugang dahon sa marijuana.
Gikumperma ni Police Major Basher Alindo, Hepe sa Police Station 5 nga konektado sa matag-usa ang mga dinakpan. Sa karon ginaandam na sa kapulisan ang kasong ipasang-at batok sa mga suspek ug posibleng sa adlawng Lunes pa mapasakaan ug kaso ang mga nasampit.
