Temporaryo nga gin-recall ni Mr. Jeck Conlu, head sang Iloilo City Public Safety Department ang pag-deputized sang mga traffic enforcer sang Land Transportation Office ukon LTO.
Ini bangud tuman ka mahal para sa mga drivers ilabi na para sa mga driver sang jeep ang multa nga indi magnubo sa 1000.00 sa tion nga makabayolar ang mga ini sang layi sa trapiko kon mangin basehan ang pagsulundan sa LTO.
Ginpahayag ni Conlu nga sa subong, mangin basehan ang mga city ordinance angot sa mga traffic violations agud indi tuman kabug-at para sa mga traffic violators ang ila violation.
Suno kay Conlu, wala sila nagalagas sang dako nga kita halin sa mga traffic violators bangud ang importante para sa ila amo ang madeliher sang maayo ang trapiko sa syudad.
Sa karon nagapadayon ang planning sang bag-o lang gintukod nga Iloilo City Public Safety Department kag nagapangayo sang kooperasyon si ICPSD head Jeck Conlu sa mga pumuluyo agud maka-tukod sang new generation of drivers and commuters nga may disiplina, tampad kag may respeto sa dalan.
Nahibaluan nga gintingob sa idalom sang Iloilo City Public Safety Department ang TMTRO, Task Force ASIS, Auxiliary kag Special Services Unit agud mas mangin epektibo ang mga ini sa ila operasyon bangud konektado ang ila mga katungdanan.
