Parehong giila isip bag-ong tourist attraction sa Probinsya sa Bukidnon ang Mt. Linungkokan sa Upper Pulangui pinaagi sa Resolution No. 2020-1599 ug Tugisan Falls sa Brgy. Patpat pinaagi usab sa Resolution No. 2020-1600.
Ang Mt. Linungkokan nadiskubrihan human makita sa maong dapit ang maanindot nga talanawon diin sa ibabaw nga bahin maaninaw ang daw sama sa dagat nga panganod.
Kini agion sa may bahin sa grade school sa Purok 5, Barangay Kulaman, Malaybalay City diin ang maong dalan nga pagbaklayon gimugna sa mga kabatan-onan ug moabot ngadto sa usa (1) ka oras ug kwarenta (40) ka minutos aron maabot ang pinakataas nga bahin.
Ang pagkadiskubre sa daw sama sa dagat nga panganod sa Upper Pulangi Region usa ka dakong tabang nga mapalambo ang turismo sa maong dapit diin gilauman nga mahuman sa tuig 2022 ang mga kadalanan gikan sa Upper Pulangi paingon sa Agusan Sur via Kalabugao, Impasug-ong ug ang dalan gikan sa Upper Pulangui paingon sa Davao de Oro, Davao del Sur ug Davao City via Cabanglasan-San Fernando Road.
Samtang ang Tugisan Falls bag-o lamang nadiskubre ug anaa makita sa pipila ka kilometros gikan sa sentro sa dakbayan sa Malaybalay. Gikan sa Barangay Hall ug Covered Court sa Brgy. Patpat, ang mga gustong mobisita sa maong falls magbaklay lamang ug duha (2) ka kilometros aron moabot sa maong area.
Sa maong waterfalls nga naila sa tawag nga Tugisan Falls, makita ang gikusgon sa tulo ka bahin nga pagdagayday sa kusog nga bulhog sa tubig nga nagsubay sa dakong bato. Ang maong tubig nga nahulog paubos sa nindot nga naporma nga bato, grabe ka bugnaw ug limpyo.
Nakadugang usab sa Tugisan Falls ang kanindot sa talan-awon sa palibot nga bahin diin makita gihapon niini ang daw sama sa dagat nga panganod sa imong pagbaklay sulod sa traynta (30) minutos paingon sa maong dapit.
