Tapaz, Capiz – Ginsabat ni Tapaz Municipal Mayor Roberto Nonong Palomar ang mga reklamo sang pila ka mga residente angut sa gintukod sini nga Tapaz Security Force. Suno sa alkalde nga wala nagabitbit sang armas luthang ang mga miyembro sang TSF.
Ginklaro sang alkalde nga hand held radio kag batuta ang armas sang Tapaz Security Force kag ang mga gwardya sang isa ka security agency nga gin-hired sini ang nagabitbit sang armas sa ti-on nga mag-roving ang TSF sa pila ka mga barangay sang Tapaz.
Ginpahayag dugang ni Palomar nga indi sini gusto nga mabutang sa peligro ang kabuhi sang mga katapo sang TSF ti-on sang ila operasyon, rasun nga ginapaupod sini ang mga gwardya bitbit ang mga ila mga armas luthang.
Indi man matuod suno kay Palomar nga nagapatigayon sang checkpoint ang TSF nga wala ang presensya sang mga kapulisan. Ginpabugal man sini nga nag-ayo ang peace and order situation sa banwa sang Tapaz, nagnubo ang kriminalidad sumugod nga nagpungko ini bilang alkalde sa bulig sang gintukod sini nga grupo.
Ginbkumpirmar ni Mayor palomar nga naglab-ot sa masobra sa 60 aang miyembro sang TSF nga nagaresponde sa tanan nga emerhensya kaangay sang aksidente sa dalanon, kalamidad kag iban pa.
