Giangkon sa rebelding New Peoples’ Army (NPA) nga nahukman na’ng patyun si Datu Rostico Sandag Porogoy gumikan sa iyang mga sala sa walhung kalihukan, apan hugut nilang gihimakak nga sila ang nagpusil patay sa biktima.
Sigun ni Ka Oto, spokesman sa Guerilla Front Committee 16 sa NPA nga bisan ug anaa na sa listahan si Datu Porogoy apan dili ang walhung grupo ang nagpusil patay sa biktima base sa iyang pagpanubay.
Niya pa nga ang padayung bangi sulod sa tribu tungod sa pag-ilog ug teritoryo maoy motibo sa pagpusil kang Datu Porogoy.
Dasun pa niya nga goons sa usa ka pulitiko sa Agusan del Norte ang biktima ug ang nakabangi niya goons usab sa kontra sa maong pulitiko.
Namahayag si Ka Oto dihang gikataho sa militar na ang NPA maoy nipusil patay kang Porogoy.
Gipahayag ni Lt. Ashely Del Rosario, spokesman sa 29th IB Phil. Army nga gawas sa pagka-Datu sa tribu ang biktima usab nagserbisyo isip sakop sa CAFGU ug daghang napasurender nga mga sakop sa NPA.
Katabang usab sa military si Datu Porogoy sa mga outreach program alang sa mga lumad.
Madumduman nga si Datu Porogoy ang sakay sa iyang XRM motorcycle, kinsa gipusil sa riding in tandem kagahapon gamit ang caliber 45 pistol didto sa Brgy Comagascas, Cabadbaran City, Agusan del Norte.
Sigun ni PCI. Glenn Sampaga, Hepe sa Cabadbaran PNP, gawas sa basiyo sa bala, aduna sab cellphone nga narekober sa crime scene nga gitoohang iya sa triggerman og gunit karon sa SOCO PNP.
Sa karon padayon pa ang imbestigasyon sa maong hitabo diin pipila ka mga anggulo ang gilantaw sa kapulisan nga posible maoy motibo sa pagpatay.
