General Santos City–Hingpit nang napasakaan ug kaso ang mag-amahan nga silang si Jose Salucan, 62 anyos nga taga Purok Manga, Barangay Kablalan, Glan, Sarangani Province ug Johny Salucan, hingkod ang pang-edaron, residenti sa samang lugar.
Ang duha suspek sa pagpatay sa biktimang si Ruben Ganton, 54 anyos residenti sa maong Barangay.
Sumala ni Po3 Paul Alido, Disk Officer sa Glan Municipal Police Station nga una nang misurender ngadto sa ilang buhatan ang suspek nga si Johny diin iyang giangkon ang krimen nga iyang nahimo.
Gilayon nga naghimo ug imbistigasyon ang iyang operatiba sa Glan PNP sa lugar ug didto nasayran nga apil ang amahan sa suspek nga si Jose sa responsabli sa krimen mao nga siya gisikop sa kapulisan.
Nasayran nga mismong ang residenti sa lugar maoy nagbutyag nga apil si Jose sa mitabang pagpatay ngadto sa biktima.Usa sa mga motibong gitumbok sa kapulisan sa pagpatay mao ang personal grudge ug land conflict.
Subay sa inisyal nga imbistigasyon sa kapulisan, nasuta nga dugay nang nagbingkil ang pamilya sa biktima ug sa suspetsado gumikan sa yuta. Nasayran nga kasong murder ang gipasang-at karon sa kapulisan ngadto sa mag-amahang suspetsado.
