General Santos City—Posibling may kalabutan sa awayan sa luna ang usa sa mga gitutuang motibo sa kapulisan sa pagpusil patay sa usa ka miyembro sa Moro Islamic Liberation Front o MILF kaniadtong milabayng adlaw sa may Barangay Tuyan, Malapatan, Sarangani Province.
Subay sa report giila ang biktima nga si Haji Muhammad Parado, 64-anyos, residente sa Purok Pulot, Brgy. Tuyan, Malapatan Sarangani Province.
Apan una ng gihingusgan sa mga kabanay sa gipatay nga wala silay nasayran nga nakaaway sa biktima sa ilahang lugar tungod usa ka buotan ang biktimang si Haji Muhammad Parado tungod nagsilbi usab kining Sultanate sa Malapatan.
Una ng milutaw sa gihimong imbestigsyon sa kapulisan nga gipusil ang biktima sa wala mailhing mga suspek samtang anaa kini sa gawas sa ilang panimalay aron unta mukuha og lubi sa dihang kalit lamang nga mibutwa ang suspek og gipusil ang biktima gamit ang kalibre 45 pistola.
Hinuon mipasalig karon si Police Chief Inspector Henrietto Villamor Jr., hepe sa Malapatan PNP nga ilaha pang palawman ang imbestigasyon aron mailhan ang mga nasaluyo sa pagpatay sa myembro sa MILF. (Emir Bariquit)
