NA-AREGLO NA! | Pamilya sang suspek kag pamilya sang mga biktima sa nagluntad nga hacking incident sa banwa sang Panay, Capiz, nag-aregluhanay na

Panay, Capiz – Nagpadulong sa Panay Municipal Police Station ang pamilya sang suspek nga nagpanglabo sa Barangay Tanza Norte, Panay, Capiz upod sa pamilya sang mga biktima agud nga magpaidalom sa settlement. Ginpahayag ni Po2 Bryan Bacay, imbestigador sang Panay PNP nga may ara na sang settlement ang pamilya Celino kag Beldia. Ginkumpirmar man ni Bacay nga naghatag na sang P30,000 ang pamilya sang suspek nga si Nestor Beldia sa pamilya Celino nga napatyan sang tatlo nila ka himata. Suno diri nga natalana man nga makigkita kag makig-areglo sa pamilya Arabia ang pamilya Celino bangud napatay man ang tatlo nila ka tuig nga bata samtang ginabulong sa ospital.
Sa madumduman nga nagluntad ang insidente sadtong Agosto 29, 2018 alas 3:46 sang hapon kun sa diin lima ang mga nagkalamatay upod na sa suspek matapos nga nagbato sa kapulisan. Gindeklarar nga dead-on-arrival sang gindangat sa Health Centrum Hospital ang mga biktima nga ginkilala kanday Concepcion Celino y Baniel,70-anyos; Ramilyn Labto y Celino, 36-anyos kag Jaira Isabel Labto y Celino, apat ka tuig ang pang-edaron.
Patay man ang ginapahayag suspek nga si Nestor Beldia y Acuyong sang nasambitan nga lugar matapos maluthangan sang nagbato sa mga kapulisan. Ginbawian man sang kabuhi ang bata nga si Hannah Fyl Lisa Aguiling, tatlo ka tuig ang edad samtang ginabulong sa Health Centrum Hospital.
Samtang ginpangdala man sa ospital ang duha pa ka mga biktima nga ginkilala kanday Telma Arabia y Bermejo, 74-anyos kag walo ka tuig nga bata nga ginkilala kay Prince Cyrel Celino nga nag-angkon sang pilas sa natuo nga abaga.
Suno sa imbestigasyon sang mga kapulisan, gulpi nga nagsulod sa poluy-an ang suspek kag hinali nga ginpanglabo ang mga biktima nga sanday Concepcion Celino, Ramilyn Labto kag Jaira Isabel Labto nga nag-angkon sang kapilasan sa nagkatuhay nga parte sang kalawasan nga gintunaan sang ila kamatayon. Ginlabo man sini ang isa pa gid sa napatay nga biktima nga si Hannah Fyl Lisa Aguiling sang masugata sini kalakip sa iban pa nga mga biktima.

Facebook Comments