Na-missing nga OFW sa Jeddah, gisubay na sa OWWA XI

Gisubay na sa Overseas Workers Welfare Administration XI ang kaso nga pagka missing sa OFW nga si Prisciliza Mae Cartagena didto sa Jeddah, Saudi Arabia.

Sumala ni OWWA XI spokesperson Maricel Sarabillo, nga nakig coordinate na ang ilang buhatan sa OWWA Jeddah pinaagi sa National Unit of the Migrant Workers office kansang maoy adunay hurisdiksyon sa kaso sa ofw nga na-missing.

Matud ni Sarabillo nga ang OWWA XI uban ang Department of Migrant Workers XI hugot ang pagkumbuya aron subayon ang gidangatan ni Cartagena tungod kay ang kasong pagkahanaw sa OFW nagkinahanglan na ug imbestigasyon sa Jeddah Police.

Nasayran usab gikan sa Department of Migrant Worker XI nga ang kaso ni Cartagena padayon pang gi-imbestigahan sa kapulisan sa Jeddah, Saudi Arabia.

Kahinumduman nga midangop sa DXDC RMN Davao ang mga ginikanan sa na-missing nga OFW tungod kay wala na silay nadawat nga inpormasyon kabahin sa pagkahanaw sa ilang anak.

RadyoMaN Erin Lumosbog