General Santos City–anaa na sa luwas nga kahimtang karon ang Deputy Chief Of Police Sa Police Station 1 nga si PSI Reynado De Armas human nga madala sa opsital human nabanggaan sa motorsiklong gimanihuan sa usa ka 17 anyos nga lalaki.
Nasayran nga nagpahigayon ug check point ang tropa ni De Armas sa Bulaong Avenue alas 10:00 ang takna sa gabie sa nakalabayng adlaw, samtang nag check kini sa miaging multicab, kalit lang kining mabanggaan sa motorsiklo sa minor de edad.
Sumala pa nga wala mabantayan sa nasangpit ang pulis gumikan sa pagdali-dali niini tungod sa kahadlok nga madakpan gumikan nga wala kini dalang lesensya.
Nasayran nga igo ra kining gisugo nga mupalit ug toothpaste sa iyang ginikanan sakay sa motorsiklo. Sa karon duna nay inisyal nga sabot ang ginikanan sa minor de edad ug si PSI De Armas samtang ang motorsiklong gimanihuan sa nasangpit nga batan-on anaa na sa kustudiya karon sa TMU. (Dave Silagan)
