NABILING PAMILYA NAN NAMATAY NA SI EMELUNI TAASAN MIBIYAHE NA PASINGOD SA BUTUAN CITY PARA SA PORMAL NA PAGPAABOT NAN PAKITABANG SA NBI
Mibiyahe na kuman adlawa pasingod sa Butuan City an nabiling pamilya sa namatay na si Emeluni Taasan, 23 anyos, ini para sa pormal na pagpatabang sa kadagkuan sa National Bureau of Investigation (NBI) sa pagpaninguha na maangkon an hustisya human na nanganak suyod sa Caraga Regional Hospital pero nakalas lakip an taghimugso na baby boy.
An live-in partner niini na si James Cresante lakip an iban na kalumunan ni Taasan an pormal na mopaabot nan ila tinguha na mapanubag an kadagkuan sa Caraga Hospital kalabot na sa amo na panghitabo. Una na nopadayag nan suyat-hangyo si Cresante ngadto sa NBI Regional Director Atty. Mario Minor para mapailayom sa otopsiya an pataynglawas sa namatay resulta sa may nakapa sila sa may tiyan niini na gahi na butang na posible na nabilin pang bata.
Kahapon taglubong na si Taasan sa Surigao City Public Cemetery na kon diin nahimong emosyonal an tibook pamilya, singgit nan mga ini na unta maangkon an hustisya para sa namatay na inahan ug anak.
