General Santos City—Nakaangkon ug 2nd degree burn ang usa ka mananagat human kining nabuthan ug LPG samtang kini anaa sulod sa bangkang panagatan nga gitrabahuan niini alas 4:00 ang takna sa kabuntagan sa may San Andres Compound, Barangay Calumpang, Gensan.
Giila ang biktima nga si Recardo Bernante, 58 anyos, residenti sa First Road, Barangay Calumpang, Gensan.
Sumala sa kaubanan sa biktima nga si Elmo Untal, minaog matud sa ilang lutuanan nga bahin sa maong bangkang panagatan ang biktima gumikan dunay gikuha.
Apan pag abot sa maong dapit, nag sindi matud pa ug sigarilyo ang nasangpit duol sa tangke sa LPG, pila lang ka sigundos ang nakalabay, nakadungog ug buto ang mga kaubanan niini mao nga ilang gisuta ug didto ila nalang nakit-an nga sunog na ang sinina sa biktima apil na ang iyang nawong.
Paspas kining gidala sa ospital aron nga mapailawom sa medikasyon. Hinuon sa kasamtangan luwas na sa kuyaw nga kahimtang ang nasangpit nga biktima.
