El City Jail Warden si Supt. Allan Vargas ya encabesa el dalida o donada de sangre para na Zamboanga City Medical Center enantes aga adentro del City Jail.
Este actividad tiene que hace con el celebracion del National Correction Consciousness week o NACOCO.
Asegun con Vargas el donada de sangre con el Zamboanga City Medical Center es un actividad que ta conduci cada tres meses donde todol qualificao personajes del BJMP tiene que dona participa.
Este un projecto del BJMP con el objecto para ayuda salva vida del projimo.
Fuera con el donacion de sangre para na mencionao hospital, monton tambien otro maga actividad ta conduci el BJMP adentro del City Jail como el juego de bola para del maga detenido, vendida del maga producto que ta produci adentro del jail inclujido el maga decoracion de pascua y el hacida de maga candela, bag, almujada y otro pa.
Si Vargas ta imbita conel publico para anda na City Jail para mira y compra maga producto que ta hace el cuantos del maga detenido. — Dan Toribio
