Tapaz, Capiz – Ginbawian sang kabuhi ang 22-anyos nga lalaki matapos nag-angkon sang madamo nga kapilasan sa lawas tuga sang paglabo sa Barangay San Nicolas, Tapaz, Capiz. Ginkilala ang biktima kay Amiliano Galagate y Villacastin sang Brgy. Camburanan banwa sang Tapaz apang temporaryo nga naga-puyo sa Barangay San Nicolas, sa nasambit nga banwa.
Base sa imbestigasyon sang kapulisan, alas 2:00 sang kaagahon nagpadulong ang biktima sa sari-sari store nga ginapanag-iyahan sang utod sang suspek nga si Perfecto Advincula, 30-anyos sang Tacloban, Leyte. Ginpahayag nga nagpanghaboy ini sang bato rason nga nagguwa ang suspek kag ginlabo ang biktima gamit ang sanduko nga nangin rason sang iya kamatayon.
Matapos ang hot pursuit operations nga ginpatigayon sang mga kapulisan sa Tapaz, natigayon nga madakpan ang amo nga suspek kag yara na nakahunong na sa karsel sang Tapaz Municipal Police Station.
(web photo)
