Pontevedra, Capiz – Nadakpan sang mga katapo sang BPAT sang Barangay Ilaya, Pontevedra, Capiz ang isa ka persona nga ginatudlo suspek sa pagpangawat sa sulod sang isa ka poluy-an sa nasambit nga barangay alas 2:00 kahapon sang kaagahon. Ginkilala ang suspek sa kay Lou Dejero y Dapat, 19 anyos kag residente sang Barangay Ilaya, sang amo man nga banwa.
Base sa inisyal nga imbestigasyon sang Pontevedra PNP, nagsulod ang suspek sa balay sang biktima nga ginkilala kay Ramil Daliva Y Ame, 46 anyos pinaagi sa bintana nga nahamtang sa comfort room. Ginkuha ni Dejero ang mga jalousies agud mahapos ini nga makasulod sa balay.
Ginkawat sang suspek ang kwarta sang biktima nga nakasulod belt bag. Nakapatong sa higdaan ni Daliva ang belt bag rason nga nabugtawan sini ang suspek. Gilayon nga nagpalagyo ang suspek, apang natigayon naman nga ini nga nadakpan sang mga BPAT alas 8:30 kahapon sang aga kag gindala sa Pontevedra Municipal Police Station.
*(photo from web)*
