Nadakpang ASG member, gikasuhan

29

Davao City-Nagatubang og kasong kalapasan sa Republic Act (RA) 10591 o Comprehensive Firearms and Ammunition Regulation Act ug RA 9516 o Illegal Possession of Explosives ang usa ka miyembro sa Abu Sayyaf Group nga nasikop atol sa checkpoint sa mga awtoridad sa National Highway Fronting New Satellite Terminal, Purok 12, Brgy. Aplaya, Digos City.

Giila sa Digos City Police Station ang giingong ASG member nga si Nurjilam Illah Isa, 24 anyos, residente sa Brgy. Aplaya, Hagonoy, Davao del Sur.

Sa interbyu sa DXDC Rmn Davao kang SPO1 Hernan Blantucas, Digos City Police Station Investigator nga dugay na kining ginapanid-an sa mga awtoridad.

“Gi-interrogate namo niangkon man pod siya nga miyembro siya,” sumala ni Blantucas.

Nakuha sa posisyon sa dinakpan ang .45 nga baril, mga bala ug gituohang Improvised Explosive Device (IED).

Sumala sa imbestigador nga posibleng aduna kiniy dautang plano nga himuon sa maong lugar.

“Siguro nag-plano na ni sila nga magpabuto sa bus terminal,” sumala ni Blantucas.

Gipalapdan pa nila ang ilang intelligence monitoring aron masikop usab ang laing mga kaubanan niini.

Gimanduan ni Davao del Sur Police Provincial Director PSSUPT Samuel Gadingan ang tanang kapulisan nga pahugtan pa ang pagbantay sa ilang area of responsibility.

“Kinahanglan magbinantayon sila, doblehon ug triplehon pa nila ang ilang pagbantay aron dili gyod ta masudlan,” matud ni Gadingan.

RadyoMan Aimee Guinita

Facebook Comments