Ivisan, Capiz – Duha ang patay samtang isa ang pilason matapos gintapak sang truck nga may karga nga bato ang isa ka motorsiklo sa Sitio Sayuyan, Barangay Malocloc Norte, Ivisan, Capiz alas 7:30 kaina sang aga. Ginkilala ang mga napatay nga biktima nga sanday Jun Abadesco kag Evelyn Valderas lunsay residente sang Brgy. Malocloc Norte sang nasambit nga banwa.
Nag-angkon sang madamo nga kapilasan si Valderas kag daw halos mautod na ang lawas sini. Samtang utod naman ang duha ka till ni Abadesco kag nag-angkon man ini sang madamo nga samad. Gindala pa sa Roxas Memorial Hospital si Jun kag Evelyn apang gindeklarar ang mga ini nga dead on arrival.
Pilason man ang asawa ni Abadesco nga si Mailyn kag yara ginabulong sa Capiz Emanuel Hospital. Ginkilala ang driver sang truck nga si Randy Sarito, 29-anyos sang Brgy. Binuntucan, Pontevedra, Capiz.
Base sa imbestigasyon sang Ivisan PNP, nagikan sa banwa sang Sapian ang truck kag magapadulong kun tani ini sa Brgy. Basiao agud i-deliver ang karga nga bato. Samtang ginasubay sang amo nga truck ang dalan sa Sitio Sayuyan, nagasunod ini sa isa ka motorsiklo nga ginamaneho ni Jun Abadesco upod sa asawa sini nga si Mailyn Dumdoman Abadesco.
Nadulaan sang preno ang nasambit nga truck kag gindalasa sini ang motorsiklo nga ginasakyan sang mag-asawa kun sa diin gintapak gid sang truck ang lawas sang biktima nga si Jun. Agud indi madalasa sang truck, ginlikaw man ni Rowel Pagar ang manibela sang ginamaneho sini nga tricycle kun sa diin didto nakasakay si Evelyn Valderas.
Lipod sa ihibalo ni Pagar, naglumpat si Evelyn kag didto nagtupa sa alagyan sang truck kag gintapak man ini. Ginhapit pa gid sang truck ang isa pa gid ka tricycle nga ginamaneho ni Antonio Orola apang maswerte nga wala ini nasamaran, magluwas gid lamang sang ginbatyag sini nga kakulba.
Yara na sa kustodiya sang Ivisan Police Station ang driver sang truck nga si Sarito nga nagsungka matapos ang insidente. Nahibaluan nga si Evelyn Valderas ang isa ka Grade 12 student sa Ivisan National High School kag nagapatigayon na sang OJT sa syudad sang Roxas.
*(photo from Rio Marie Afable Lorania)*
