Davao City – Kapin kon kulang P800,000 ang damyos sa sunog nga niulbo ala-una sa kahaponon sa Purok 3, Tibungco ning syudad sa Davao.
Sa interbyu sa Rmn Davao kang Panacan Fire Station Commander Fire Insp. Willy Melodi, nga sa ilang pagpanubay, nag-over heat ang blower sa kalan hinungdan sa electrical short circuit sa usa ka balay nga giabangan ni Rex Tiongco.
Tibuok gambalay nga gipanagiyahan ni Ma. Teresa Villarta ang gilamoy sa dakong kalayo diin lakip niini unom ka mga establisemento, boarding house, usa ka simbahan ug usa ka bongo nga truck.
Gideklara sa kabomberohan ang sunog nga under control alas 2:01 ug gideklarang fire out alas 3:30 sa hapon.
Padayong pahimangno sa BFP ngadto sa katawhan nga dili byaan ang mga niluto ug sigurohong naka-off o palong na ang mga gilutuan ayha byaan aron malikayan ang kitchen fires.
Sa pikas bahin, gisulti ni Brgy. Tibungco Kapitan Buddy Calvo nga nakaandam ang barangay hall kung aduna may magkinahanglan og temporaryong kapuy-an sa mga apektado sa sunog.
RadyoMaN Aimee Guinita
