General Santos City–Nagpadayon ang gihimong imbistigasyon sa Police Station 6 kalabutan sa pagpamusil ngadto sa miyembro sa Clearing team sa syudad nga si Agustin Estologa, 54 anyos nga taga Barangay Mabuhay, Gensan kansa gipusil sa wala pa mailhing suspek alas 7:00 pasado ang takna sa gabie sa may J. Catolico Avenue ning syudad.
Sumala ni Police Major Tirso Pascual, Hepe sa Police Station 6 nga pauli na unta ang biktima human sa gihimong clearing operation sa lugar dihang kalit kining gipusil sa wala mailhing suspek.
Nasayran nga damay ang biktimang si Conchita Bibang kansa naatlang miagi duol sa biktima dihang nahitabo ang pagpamusil. Gilayong gidala sa ospital ang mga biktima human sa pagpamusil samtang suspek paspas nga misibat human sa krimen.
Samtang wala gibaliwala sa Police Station 6 ang anggulong may kalabutan sa iyang trabaho isip miyembro sa Clearing Team ang motibo sa pagpamusil sa biktima.
Nasayran nga niadtong bulan sa disyembre nagpahigayon na usab ug Clearing operation ang Grupo ni Estologa sa lugar diin ubay-ubayng mga produkto sama sa sapatos ang ilang nakumpiska.
Duha ka adlaw ayha ang krimen, subling nagpahigayon ug clearing operation sa susamang lugar ang grupo sa biktima ug gituohan nga nangasuko ang mga naligsan niini maong siya gipusil.
