General Santos City–Mamahimong kasuhan ang kinsa mang negusyante nga manghimulos sa sitwasyon dungan na usab sa bahad sa COVID 19-kini ang gikabutyag ni Giovanni Man-on, nga nakabase sa Prize Monitoring sa DTI-Gensan.
Sumala ni Man-on nga sa karon daghan gyud ang mga nanghimulos pinaagi sa pagbaligya ug taas nga presyo sa mga medical supplies sama nalang sa face mask, alcohol ug uban pa.
Gani adunay usab nga halos doblehon ang presyo sa mga medical supplies nga ilang ginabaligya.
Tungod niini nanawagan si Man-on ngadto sa mga konsumante nga ireport ngadto na sa ilang buhatan o dili ba kaha sa unsa mang ahensya sa gobyerno nga nagatutok niini aron nga masampolan pinaagi sa pagpasang-at ug kaso.
Matud niini nga himuon lang sa mga konsumante, mukuha ug ebidensya aron nga mapakusog ang ilang pagpasang-at ug kaso.
Dugang pa ni Man-on nga kung dili sila masampulan, magpadayon sila sa gihimong hiwi ng binuhatan mao nga kinahanglan gyud sa otoridad ang kooperasyon sa katawhan sa pagsanta niining mga abusadong indibidwal nga mapahimuslanon sa sitwasyon.
Gipahinumduman usab ni Man-on ang katawhan nga dili mag panic buying sa mga medical supplies sama sa alcohol nga halos hurot hurot na ang supply sa mga mall ug bisan na sa mga pharmacy.
Matud niini nga dapat mahimong responsable ang katawhan sa pagpalit ug mga medical supplies.
Dapat ang ilang paliton kadtong sakto ra kanila ug dili sobra-sobra aron duna pay mapalit ang ubang konsumante.
