Nangin matawhay ang nagapadayon nga enrollment sa tanan nga mga pampubliko nga eskwelahan sa rehiyon gamit ang mga nagkalain-lain nga pamaagi nga indi na kinahanglan magpadulong sa tagsa ka mga eskwelahan matapos nga ginadumilian ang mass gathering tungod sa paandam sang coronavirus disease ukon COVID-19.
Suno kay Department of Education 12 Regional Director Dr. Allan Farnazo madamo sang pamaagi nga makapaenrol sang ila mga kabataan ang mga ginikanan kapareho sang online enrollment, paagi sa pagtext sang mga kabataan sa dati nila nga teacher kag may drop box nga ginpalapta sa mga tindahan sa barangay nga sarang makakuha sang enrollment form kag kon mafil-apan ihulog man sa nasambit nga drop box.
Ginpahayag man ni Dr. Farnazo nga tinguhaan nila nga kayahon matapos nga wala sang matabo nga face to face learning tubtob nga wala sang vaccine base sa pahayag ni Presidente Rodrigo Duterte.
Ginasuhestyon niya man sa mga ginikanan nga ipaenrol ang mga kabataan sa mga eskwelahan nga malapit sa lugar kag magbutang sang learning area sa balay agud mabutang sa hunahuna sang mga kabataan nga sa pagsulod nila sa nasambit nga lugar ang magtuon sila.
Ginkumpirmar man sang Dep. Ed. opisyal nga tungod sa sitwasyon sa subong ang mga most essential learning competencies ang ginpangbuhinan kag ang mga laboratory ukon experiment ang ihatag sa ulihi nga part sang learning sang mga kabataan tungod posible may-yara na sang vaccine.
