ILOILO CITY – Dakpon ang nagalimos sa nagapakilimos.
Ini ang mando ni City Administrator Atty. Hernando Galvez sa Public Safety and Transportation Management Office (PSTMO).
Suno kay Galvez duna sa mga Ilonggo nga maalwan gani madamo ang nagakadto diri agud magpakilimos ilabi na kun nagahilapit ang paskwa.
Bangud sini ginaduso sang city administrator ang hugot nga pagpatuman sang anti-mendicancy law.
Ini ang kasuguan nga nagadumili sa pagpakilimos kag sa paghatag sang limos.
Sa idalum sang kasuguan may multa nga indi magnubo sa P1,000 ang madakpan nga adults nga nagapakilimos ukon nagalimos kag mahimo pa nga mabilanggo snag tubtob sa apat ka bulan.
Bilang sabat, ginpahayag ni Mr. Jeck Conlu, head sang PSTMO gilayun nila nga ipatuman ini nga kasuguan.
Nangin problema sang syudad ang pagdugok sang mga Badjao sa pihak sang pagsapopo sa ila.
Pahayag ni Conlu ginkumpermar sa iya sang Philippine Coast Guard nga kada aga madamo sang mga Badjao ang nagasakay sa barko gikan sa Bacolod kag nagadungka sa Dumangas.
Sa karon naglambot na sa masobra 50 ka mga Badjao kag Ati ang ila nabuligan nga makapauli sa ila ginhalinan nga lugar. /// Photo from web
