CAPIZ – Kinahanglan nga pasangkaron ang kampanya agud matapna ang padayun nga pagtaas sang kasu sang HIV/AIDS sa Capiz. Ini ang guinpahayag ni Governor Tony del Rosario sang iya mahibal an nga padayun ang pagtaas sang numero sang AIDS sa Probinsya sang Capiz suno sa report sang HIV/AIDS Council sa guin patigayun nga sinapul sa Governors Office Idea Room. Naglab-ot na sa 169 ang narecord nga biktima sang Acquired Immuno Deficiency Syndrome (AIDS) humalin Enero 1986 tubtob Marso 2018. Ini guina lakipan sang syudad sang Roxas nga may pinakataas nga kasu nga 60, Maayon nga may ara sang 2, Sapian 2, Jamindan 3, Tapaz 4, President Roxas 4, Pontevedra 5, Mambusao 5, Ivisan 5, Dumarao 6, Dao 7, Cuartero 7, Sigma 7, Panit an 9, Dumalag 10, Pilar 10, Panay 11, isa ka unknown case kag 11 ka newly recorded cases. Pinaka damu nga kasu sang AIDS ang halin sa naga pang-idaron 25-34 anyos nga may ara sang 101 nga guina bug osan sang mga young professionals, 15 anyos nga may ara 1, 15-24 anyos nga may 31, 35-49 anyos nga may 22, 50 anyos pataas nga may 3. Probinsya sang Capiz ang may pinaka-una nga kasu sang Mother to Child AIDS transmission sa Western Visayas.
Kaangot sini hugot nga guina panugyan sang HIV/AIDS Council nga mag-halong sa pag pakighilawas kag manging tampad sa ila mga partner kag maglikaw sa pre-marital sex. Kag guinpaabot man nila sini nga bukas ang ila talatapan sa mga luyag pagpaidalom sa examinasyon agud mahibal an ang estado sang ila lawas kung AIDS ang pagahinalaan.
(c) Capiz Aksyon News Center
