Maisog nga nagbuwelta si Mrs. Marivic Mabilog sa panibag-o nga pamahog ni Presidente Rodrigo Duterte batuk sa iya bana nga si anay Mayor Jed Patrick Mabilog nga isunod ini sa mga napatay nga narco-politician kon magtuyo nga magpauli sa Pilipinas.
Ginpahayag ni Mrs. Mabilog nga sulit-sulit lang ang isyu sang Presidente batuk sa iya bana kag posible wala pa ini maka-move on bangud sa manubo nga boto nga nakuha sini sa siyudad sang nakaligad nga eleksyon sang 2016.
Ginhatagan pagtamod sini nga wala man sang mapakita nga ebedensya ang Presidente bisan nga ginapamilit sini nga involve ang anay alkalde sa illegal nga druga.
Gindugang pa sang asawa sang anay alkalde nga dapat magpalantaw na lang sa doktor si Duterte agud mabulong ini sa iya balatian sa utok.
nahibaluan nga ginhimo ni Presidente Duterte ang liwat nga pamahog kay Mabilog sa pag-atubang sini sa Filipino community sa South Korea.
