Lake Sebu, South Cotabato — Balhog na sa silda sa Lake Sebu Municipal Police Station ang usa ka lalaki human kining nakuhaan ug pusil sa may Sitio Narra, Barangay Ned, Lake Sebu, South Cotabato niadtong nakalabayng Domingo.
Sa record sa Lake Sebu PNP usa ka concerned citizen ang mireklamo sa kapulisan human aduna matud pay lalaki nga gituohang hubog nga nanghasi sa lugar.
Tungod niini gilayong girespondihan sa kapulisan ang lugar ug didto nakit-an ang suspek nga si Roger Casipi, 46, single, ug residenti ra usab sa maong lugar.
Bitbit matud pa sa maong suspek ang usa ka homemade nga shot gun. Aron malikayan nga makadisgrasya gisikop sa kapulisan ang suspek ug gibalhog sa prisohan.
Sa karon giandam na sa kapulisan ang pagpasang-at ug kaso ang nahisgutang suspetsado human kining nakuhaan ug pusil.
