CAPIZ – Nagdangup sa talatapan ni Capiz Vice Gov. Esteban Nonoy Contreras si Leonila Besar, iloy ni Yolanda Villasis nga OFW sa Kuwait nga nagapangayo sang rescue bangud ginapagutuman sang iya employer. Luyag ni Besar nga gilayon nga magpauli na lang sa Pilipinas bangud sini luyag nga may matabo pa nga malain sa iya anak.
Nagpasalig man si Vice Gov. Contreras nga buligan ang pamilya, piaagi sang iya mga contact sa DFA kag sa OWWA.
Sa madumduman nga nagaapelar sang bulig ang isa ka OFW nga bangud ginapagutuman sila sang ila employer sa Kuwait. Sa post ni Gelyne Fuerte Besar sa iya nga facebook account sadtong February 13, ginpahayag sini nga pila na ka adlaw nga wala sila ginapakaon sang ila employer kag nagamantenir na lamang sila sang sang tubig upod ang isa pa gid ka kabulig sa balay bangud wala sila ginahatagan sang pagkaon.
Suno pa diri nga gusto na nila nga magpauli diri sa Pilipinas bangud indi na sila maka-agwanta. Nagapangayo man ini sang bulig nga makauli na sa diri sa Pilipinas. Samtang nangin viral pa gid ini sang gin-share ni Ires Casumpang Orpeza ang post sang iya nga abyan nga si Yolanda B. Villasis gamit ang facebook username nga Gelyne Fuerte Besar. Suno kay Orpeza, luyag na ni Villasis nga magpalagyo apang nahadluk ini nga pasibangdan sang iya employer nga nagpangawat ini.
Ginpahayag dugang ni Orpeza sa iya post sa facebook nga ikatatlo na ini subong nga employer ni Villasis matapos nga ginbaligya ini sang iya sang duha ka mga anay employers. Nagalaum man si Orpeza nga mabuligan ang iya abyan nga si Yolanda Villasis nga makabiya sa iya amo kag makapauli sa Pilipinas. Nahibaluan nga si Villasis ang residente sang Barangay Agambulong, Jamindan, Capiz kag isa ka domestic helper sa sa Surrah, Kuwait.
