Malaybalay City, Bukidnon – Gidepensa karon sa Traffic Management Center kon TMC Malaybalay nga dili nila mapugos ug papahawa ang mga nanag-iya ug sakyanan nga gipang-parking atubangan sa Plaza Rizal sa siyudad sa Malaybalay.
Una niini, gireklamo sa usa ka concern citizen sa RMN ang mga sakyanan nga adunay marka nga “For Sale” nga anaa pa atubangan sa Plaza Rizal, nga daplin sa National Highway taliwala sa kahagip-ot sa dagan sa trapiko.
Sa interview sa RMN Malaybalay ngadto kang Joseph Jabla, ang head sa TMC-Malaybalay gibutyag niini nga dili nila kini mapugos pagpapahawa tungod kay wala pay solidong basehan, mabalaod man o ma-traffic code sa local aron kini abogon.
Katarungan matud pa sa mga tag-iya niini nga nag-park lang sila sa mao nga dapit tungod kay wala usay nakabutang nga no parking.
Apan matud ni Jabla nga sa ilang proposal sa traffic code gi-apil na kini nga area sa dili na paparkingan.
Gisulayan na matud pa nila kini ug no parking kaniadto apan gikuwestiyon sila sa mga concern citizen kung unsay basehanan niini maong ila kining gipapas.
Matud sa TMC head nga ila na kining gi-kompronta apan dili matud pa nila kini mapugos sa pagpahawa maong ilang gipaningkamutan karon nga ma-aprubahan na ang ilang gidusong proposal.
