Davao City- Makaalarma na ang nagkabata nga edad nga ‘commercial sex workers’ sa syudad base sa talaan sa TALIKALA Inc., usa ka Non Government Organization nga nagpakabana sa katungod sa mga kabataan ug kababainhan sa syudad.
Matod pa, sa ilang buhatan karon adunay silay gi-kustodiya nga nueve anyos (9 years) human nagpatabang ang iyang ginikanan tungod sa gidangatan sa iyang anak.
Sa interview sa DXDC RMN Davao kang Jeanette Ampog, Executive Director sa TALIKALA Inc., usa sa ilang nakitang hinungdan sa nagkabatang CSW mao ang kawad-on, ug milayas sa ilang pinuy-anan.
Dugang pa niya, duna usab 12 anyos ang nalambigit sa pagbaligya sa iyang lawas tungod kay kulang ang income sa iyang ginikanan nga dili gayud makapaigo sa ilang panginahanglanon lakip na sa pagkaon. Miabot ang maong bata sa ilang buhatan human nagpatabang ang ginikanan tungod sa gihimo sa iyang anak nga sayo kaayong nagbaligya sa iyang dungog.Tungod niini, ilang gitabangan ang bata ug ilang gipaeskwela, apan nakurat na usab sila sa ilang nasayran gikan sa iyang ginikanan nga mibalik na usab sa iyang buhat ang ilang anak sa higayong magkulang sila sa ilang pagkaon.
Gisaysay pa usab ni Ampog nga usa sa ilang gibasehan ang report gikan sa mga taxi drivers nga daghang mga menor de edad mosakay kanila ug mohanyag nga makighilawas bugti sa bayad. Apan matud pa ni Ampog, ang ubang taxi drivers mubalibad pinaagi sa paghatag na lamang ug 20 hangtod 50 pesos aron lang mokanaug.
Kasamang Bernard Pantallon
