Nagkagrabeng pag-atake batok sa mga kritiko ni Duterte, gikundena sa Kadamay-Northern Mindanao

24

Gikundena karun sa Kalipunan ng Damayang Mahihirap o Kadamay-Northern Mindanao ang nagkagrabeng pag-atake sa gobyernong Duterte batok sa mga kritiko.

 

Lakip usab niini ang pag-atake sa mga aktibista ug organisasyon nga nagasupak sa kontra kabus ug kontra katawhan nga patakaran ug programa sa presidente sama sa Train law, Martial law sa Mindanao, Charter Change ug uban pa.

 

Kini tungod sa bag-ohay pa lang nga gipagawas ni Presidente Duterte nga proclamation No. 572 nga gipirmahan niadtong Agosto 31 batok kang Senador Trillanes.

 

Sa maong proklamasyon sikopon si Trillanes pinaagi sa pagbawi sa amnestiya nga gihatag kaniya tungod matud pa sa teknikalidad nga wala kini nag-apply sa amnestiya ug wala pud kini niangkon sa iyang mga kalapasan.

 

Matud ni Kadamay Regional Chairperson Francisco Pagayaman nga “Marcos sauna, Duterte karun.

 

Gibutyag ni Pagayaman nga dagway kini sa diktadura diin tanang kritiko gustong pitolon sa presidente matuman lang ang iyang ambisyon nga magpabilin sa gahum.

 

Gidugang ni Pagayaman nga gusto usab sa presidente nga iliway ang kapalpakan niini nga sulbaron ang krisis sa bugas, pagtaas sa mga palaliton, droga, kawalay trabaho ug uban pa.

Facebook Comments