General Santos City–Nagtingkagol karon sa selda sa Alabel Municipal Police Station ang usa ka Mohamad Zakizul Karnaen Harid, 30 anyos, nga nanimuyo sa Purok Islam Barangay Tuyan, Malapatan, Sarangani Province human nga masikop kini sa check point sa mga personahe sa Provincial Mobile Force Company sa Purok Fatima, Barangay Maribulan, Alabel Sarangani Province alas 11:00 ang takna sa gabie.
Sumala pa ni PO2 Nelson Lalisan, ang imbistigador sa Alabel Municipal Police Station nga nakuha matud pa sa nasangpit ang usa ka kalibre 45 nga armas nga dunay 2 ka magazine ug 16 ka mga buhing bala nga gisukbit sa iyang hawak.
Una nang nagpaila nga usa kini ka sundalo nga na assign sa 73th IB kung diin iyang una nga gihatag nga pangalan mao ang usa ka Ibrahim Mokasirin.
Sa gihimong pagverify sa mga pulis migula nga ang pangalan nga una niini nga gigamit iyaha sa usa ka sundalo nga na-assign sa 27th IB kung diin kaila lang matud pa sa suspect.
Nag patala naman usab si Mokasirin sa Alabel Municipal Police Station aron nga limpyuhon ang iyang pangalan nga gigamit sa nasangpit nga suspect.
Mag-atubang ug kasong pag supak sa RA 10591 kon comprehensive law on fire arms and ammunition ug ang pagsupak sa gun ban, samtang ginasuta pa usab karon ni PO2 Lalisan kung posible kini nga mapasakaan ug kasong usurpation of authority human nga nagpaila kini nga usa ka sundalo.
Nagdumili naman usab nga muhatag sa iyahang pahayag ang nasangpit nga suspect.(Dave Silagan)
