Davao City – Arestado ang nagpailang army reservist human kini naharang atol sa joint checkpoint sa Task Force Davao ug Bunawan Pnp sa Lasang detachment didto Sa Sitio Licanan, Brgy Lasang, Bunawan District, Davao City.
Segun ni Task Force Davao Commander Col Nolasco Mempin atol sa inspeksyon nasayran nga walay mga dokumentos ang dala nga armas sa suspek nga si Alexander Valencia Soriano, 58 Years Old, minyo ug residente sa No. 5 Florante St., Brgy. Plain View, Mandaluyong City.
Nakuha sa mga awtoridad ang usa ka kalibre .45 nga pusil, 3 ka mga magazine nga adunay sulod nga 15 ka mga bala, duha ka handheld radio ug usa ka set sa uniporme sa sundalo.
Matud sa imbestigasyon sa mga tinugyanan sa balaod, ang dinakpan nagpailang sakop sa 1st Tas Ncr, AFP Reserve Command didto sa Camp Emilio Aguinaldo.
Nasuta usab nga ang gisakyang private bus sa suspek uban ang 23 ka mga pasahero ug ka-convoy niini nga van pulos mga colorom.
Ang maong mga behikulo iligal nga kapamasaheruan gikan sa Cubao, Quezon City padulong og Davao City.
Sumala ni Mempin nakaikyas ang laing suspek kinsa drayber sa van una pa man kini nakaabot sa checkpoint sa may Lasang.
Kasong may kalapasan sa RA 10591 kon Comprehensive Firearms And Ammunition Regulation Act ang gipasang-at batok sa suspek.
Samtang gi-impound na sa may bunawan pnp ang duha ka mga kolorom nga mga sakyanan.
RadyoMaN Aimee Guinita
