Pa-imbestigahan ni Lanao del Sur Provincial Governor Mamintal Adiong, Jr. ang nagpailang provincial jail guard kinsa nadakpan niadtong Dominggo tungod sa pagdala niini og 1.3 milyon pesos nga kantidad sa gituohang shabu.
Sa usa ka statement nga gipadala kagahapon sa media, namahayag si Adiong nga ang suspek, kinsa giilang si Walid Nasser Usman, residente sa Baloi, Lanao del Norte, dili empleyado ug wala nahimong empleyado sa Provincial Government sa Lanao del Sur.
Nadakpan si Usman sa Regional Drug Enforcement Unit (RDEU) 10, nga maoy nagsunod kaniya gikan sa Iligan City, hangtud nga ma-aresto kini sa usa ka checkpoint sa Barangay Tampilong, Marawi City ug nakuha gikan kaniya ang 200 gramos nga gituohang shabu.
Nakuha kang Usman ang identification card o ID nga adunay logo sa provincial jail, iyang pangalan ug litrato ug pangalan ug pirma ni Adiong.
Apan miingon ang gobernador nga peke ang maong ID.
Una na usab gilimod ni provincial jail warden Acmad Tabao nga kauban nila kini sa trabaho. (Divina M. Suson, March 11)
