Nagpauli nga mga stranded OFW`s nga taga-South Cotabato naglab-ot na sa 82, apang posible madugangan pa, pasyenti nga taga –Tantangan nga nagnegatibo sa COVID-19.

Dagsa na ang nag-abot nga mga Overseas Filipino Workers ukon OFW`s sa probinsya sang South Cotabato matapos nga may kamanduan si Presidente Rodrigo Duterte nga papaulion ang tanan nga stranded OFW`s sa ila tagsa ka lugar subong nga semana.
Base sa datos sang Integrated Provincial Health Office sang Mayo 25 yara sa 82 ka mga OFW`s ang nag-abot dire sa probinsya nga ginsugat naman sang tagsa sini ka mga LGU`s sa General Santos City Airport kag gilayon nga ginpaidalom sa 14 days quarantine sa mga isolation area sa ila lugar.
Sa nasambit nga numero madamo ang dire sa syudad sang Koronadal nga may 26, Polomolok -15, Surallah -11, Banga – 7 Norala – 6, Sto. Niño kag Tupi may tig- 5, Tantangan – 4, T`boli, Lake Sebu kag Tampakan nga may tig-isa.
May-angot sini, ginalauman nga madugangan pa ang numero sang mga stranded OFW`s kag mga locally stranded nga residente sang South Cotabato nga magpauli dire sa probinsya tungod sa kamanduan sang presidente.
Samtang base sa datos sang Provincial Tourism Office South Cotabato natalana naman nga magpauli ang mga residente sang probinsya nga locally stranded sa May 28 nga halin sa Davao nga yara sa 70pax, May 30 nagalab-ot sa 230 ka mga residente nga halin sa Manila kag sa May 31 yara sa 100 pax ang halin sa Cebu.
Ginaapela naman sang pamunuan sang IPHO suno kay Provincial Health Education and Promotion Officer Hannah Ebeo sa mga nagpauli kag magpauli pa nga magsunod gid sa 14 days quarantine, ipadayon ang physical distancing, hand washing kag iban pa.
Ginkumpirmar man ni Ebeo nga nagnegatibo sa COVID -19 ang mga close contact sang COVID -19 patient sa banwa sang Polomolok base sa resulta sang RT PCR, apang nagapadayon pa ang imbestigasyon kon bala may travel history ini. Samtang ang pasyenti sa banwa sang Tantangan nga nagpositibo sa rapid test ang nagnegatibo naman sa COVID -19 base sa resulta sang RT PCR.